'코로나 19'  극복과 원불교 대각개교절을 위한 특별 기원문입니다. : 최대석 회원 번역입니다.

 

Speciala preĝo

por venko super la kronvirusa malsano

kaj por la Tago de Granda Iluminiĝo kaj Fondo

 

Ĉielo kaj tero, de supre nin pririgardu!

Gepatroj, de supre nin pririgardu!

Kunvivuloj, responde nin pririgardu!

Leĝoj, responde nin pririgardu!

 

En la ○a de aprilo de la 105a jaro de ŭonbulismo,

ni, membroj de la templo de la Societo de Ĝusta Tero,

kun pura menso faras ĉi tiun specialan preĝon

antaŭ la darmkorpa budho, la kvar bonfaroj.

 

Ho, darmkorpa budho, kvar bonfaroj!

Nun mondaj homoj suferas malfacilan vivon kaŭzatan de la kronvirusa malsano kaj tagon post tago vivas kun timo pri estontaj ŝanĝoj.

Tamen ni dankas vin pro via konduko, por ke ni feliĉe renkontu ĉi tiun darmon kaj sente sciu la kvar bonfarojn, sen kiuj ni ne povas vivi, kaj faru ĉi tiun preĝon.

Ni dankas la instruistojn, kiuj igis nin vivi dankan vivon eĉ en malfavoraj situacioj, prenante kiel lampon la veron de unu cirklo, kiun Sotesano proklamis.

Ni pentas retrorigardante la pasintan tempon, kiam ni egoisme strebis nur por ni mem.

Bonvolu igi nin profunde pripensi, kion ni devas vere fari en ĉi tiu epoko, kiam materio jam disvolviĝas.

Bonvolu igi nin klare kompreni, ke la tuta homaro estas unu familio kaj unu vivo.

Bonvolu gvidi nin, por ke per spirita disvolvo ni en kronvirusa risko nasku unucirklajn florojn same, kiel lotusoj en kota lago naskas aromajn florojn.

 

Ho, sankta darmkorpa budho, kvar bonfaroj!

alfrontante la kronvirusan malsanon, ni profunde eksentas, kiom kara estas la ordinara ĉiutaga vivo donita de la kvar bonfaroj.

Vidante, ke la malsano komenciĝinta en malgranda regiono rapide disvastiĝas tra la tuta mondo senkonsidere al sekso, aĝo, boneco kaj rango, ni klare ekscias, ke la malsano de nia nuna najbaro estas ĝuste nia sano, kaj ke la malgraŭ nia scio ignorata sufero de fora lando povas esti tiu de ni kaj nia familio.

Ni profunde ekkomprenas la grandan potencon de estaĵo nevidebla por ni malsaĝaj, kiuj raviĝis de la potenco de pompa materio kaj strebis nur al la vidaĵo antaŭ la okuloj.

Sotesano diris: “Jam progresas materio, ni disvolvu la spiriton,” kaj proklamis verreligian kredon kaj realmoralan trejnon. Ni jam ekscias, ke ĉi tiu instruo estas ĝuste por savi nin mem, savi nian familion kaj savi la homaron kaj la mondon.

Bonvolu doni lumon, forton kaj kuraĝon al ni ĉiuj kunpreĝantoj, por ke ni fariĝu fidelaj ŭonbulanoj, kiuj plenumas ĉiujn ĉefajn punktojn de ĉiutaga praktikado, kiujn proklamis Sotesano, kaj montras altruismon en la vivo per sindona studo.

 

Ho, darmkorpa budho, kvar bonfaroj kun favoro kaj potenco!

bonvolu igi ĉiujn helpi kaj bazi unu la alian danke al ĉi tiu speciala preĝo, kiun ni faras por ni mem, familio, najbaroj kaj la mondo, festante aprilon de la Granda Iluminiĝo kaj Fondo, kaj do bonvolu igi la tutan mondon plena de espero kaj amo.

Bonvolu gardi la sanon de ĉiuj sindonuloj, kiuj ĉi-momente en la danĝero de infektiĝo penas savi la vivon de malsanuloj.

Bonvolu prizorgi kaj gvidi nin, por ke en kronvirusa krizo ni pligrandigu spiritan potencon kaj realigu la bonvivan paradizan komunumon de spirita disvolvo per granda edifado.

 

Ni tutkore preĝas kaj faras kvar riverencojn.